11 ka puwesto sa Passi City Public Market ginkawatan

PASSI CITY, Iloilo — Duha ka beses nga ginkawatan sa isa lang ka semana ang Passi City Public Market.

Suno kay Passi City Public Market Association Pres. Edsel Gacho, natabu ang una nga pagpangawat sang Lunes, Agosto 7. Tatlo ka puwesto suno sa iya ang ginkawatan sa meat section kag duha naman sa vegetable section.

Natabu naman ang ikaduha nga pagpangawat kahapon sang kaagahon sa meat section.

Ginpabutyag ni Gacho nga may mga watchman man sila nga gin-assign sa merkado apang posible nga yara sila sa iban nga area sang nag-atake ang kawatan. Dugang niya, madugay naman nga wala nagagana ang mga CCTV cameras sa merkado.

P5,000 tubtob P10,000 suno pa kay Gacho ang pinakadaku nga cash nga nakuha sang kawatan. Ginguba suno sa iya ang mga kandado sang mga cabinet sa puwesto kun diin nakabutang ang mga gamit kag kuwarta nga inugbayad sang mga vendor sa ginakuhaan nila sang karne.

Nag-coordinate na ang market association sa barangay kun diin nasakop ang merkado agud mapabantayan sa tanod kada gab-i. Madugang man sila sang watchman samtang wala pa makay-o ang CCTV cameras kag maga-deploy man sang mobile patrol ang police sa area.

Ginpahayag pa ni Gacho nga indi ini ang pinakauna nga tiun nga ginkawatan ang merkado. —via Aksyon Jorge Cabrera