School supplies sa Iloilo City mabakal na samtang nagahilapit ang pagbukas sang klase

Iloilo City —Ginapaabot sang mga nagabaligya sang school supplies sa siyudad nga madamo pa gid ang mabakal sa ila samtang nagahilapit ang pagbukas sang klase.

Sa pagpamangkot sang Aksyon Radyo Iloilo News Team sa mga saleslady, halin sang Hulyo madamo na sang mga nagapamakal sang school supplies.

Mabakal ang mga notebooks, writing kag composition, nga nagabili sang P22 tubtob P25, pad paper P22 tubtob P25, P39 tubtob P45 sa intermediate kag P55 pesos sa yellow pad.

Yara naman sa P29 tubtob P44 ang presyo sang kada box sang crayons, P11 naman ang kada lapis, makabakal man sang ballpen halin P7 tubtob P25 kag eraser nga mabakal sang P4 tubtob P19.

Nagpaguwa ang Department of Trade and Industry (DTI) sang price guide agud may giya ang mga bumalakal.

Ang price guide ginalakipan sang specific brands sang notebooks nga ginabug-usan sang composition, spiral kag writing, pad paper halin Grades one to four kag intermediate, lapis, ballpoint pens, crayons, erasers, sharpeners kag rulers.

Sa natalana nga pagsugod sang school year 2023-2024 sa Agosto 29, ginpabutyag sang DTI ang suporta sa Balik Eskwela program sang Department of Education paagi sa pag-issue sang price guide para sa school supplies.

Base sa price guide, ang notebook nagabili sang P23 tubtob P52. Ang Grades one to four pad paper naman ang nagabalor sang P21 tubtob P28. Nagabili naman sang P31 tubtob P48.75 ang intermediate pad paper.

Makita man sa price guide ang mga presyo sang writing materials pareho sang lapis kag ballpoint pens nga nagabili sang P11 tubtob P17, kag P9.75 tubtob P19.

Nagadepende naman sa brand nga mabakal sang konsumedor ang kada box sang crayons nga may walo ka colors sa diin P12 ang pinakabarato kag P34 ang pinakamahal.

Ang 12-color pack naman nagabalor sang P32, samtang ang 16-color pack nagabili sang P24 tubtob P69.
Ang small, medium kag large sizes naman sang eraser ang nagabili sang P4.50 tubtob P20.

Suno sa price guide, ang sharpeners kag rulers nagabalor sang P18 tubtob P69 kag P22 tubtob P27.75. —via Maria Kayla Tingzon