Masobra P1.2 million nga balor sang suspected shabu na-recover sa drug buy bust operation sa Jaro
ILOILO CITY — Naglab-ut sa P1, 220,000 nga balor sang suspected shabu ang na-recover sang kapulisan sa apat ka mga nagkaladakpan sa drug buy bust operation sa Brgy. Desamparados, Jaro kahapon, Agosto 12.
Ginkilala ang subject kay John Kennard Dejeron aka Toto/Tawi, 23-anyos nga High Value Individual (HVI) kag residente sang amo man nga lugar.
Nadakpan man si Jalin Lim, 22-anyos sang Brgy. Simon Ledesma, Jaro; Jo Annalyn Dela Cruz, 45-anyos; kag Eriberto Atadero Jr., 50-anyos nga lunsay residente sang Brgy. Desamparados.
Nabaklan sang operatiba sang City Drug Enforcement Unit (CDEU) ang subject sang duha ka sachets sang suspected shabu sa balor nga P25,000.
Na-recover pa gid sang pulis ang lima ka sachets sang suspected shabu, duha ka weighing scale, P600 proceeds money, rolled aluminum foil, lima ka magagmay nga aluminum foil, duha ka bundle sang empty plastic sachet, apat ka plastic sachet nga may traces sang residuem, kag iban pa nga kagamitan.
Suno kay Kagawad Arnel Ledesma, wala sila sang ideya kun diin nagakuha sang illegal drugs ang mga nagkaladakpan tungod sa pagkamatuod, wala na sang may mga nagasulod sa ila barangay nga pangayaw.
Gina-check naman sang barangay officials ang palibot sang ila lugar agud indi na magdamo ang mga naga-engage sa illegal drugs.
Ginpahayag naman ni Police Captain Roque Gimeno III, team leader sang CDEU nga kay alyas Nognog sa Bakhaw, Mandurriao nagakuha sang supply sang illegal drugs ang subject.
Ginpabutyag niya nga tungod lapitanay lang ang Mandurriao kag Jaro, nagakatabo ang transaksyon sa Desamparados.
Nagpalamalibad nga magpa-interview ang mga nadakpan.
