Mag-utod dakup sa drug operation sa Oton
ILOILO—Nadakpan sa drug buy bust operation sa Brgy. Trapiche, Oton kahapon, Agosto 27 ang mag-utod nga ginakabig sang police nga dealer sang illegal drugs sa bug-os nga banwa.
Ginkilala ang subject kay Joevenel Legarde, 39-anyos nga fish vendor. Nadakpan man ang iya manghod nga si Gerald, 34-anyos. Lunsay residente sang Oton ang mag-utod.
Suno kay Police Major Fernand Limbungan, hepe sang Oton Municipal Police Station, nadakpan na sang 2019 ang manghod sa kaso may kaangtangan sa illegal drugs pero nakaguwa tungod sa plea bargaining agreement kag nagapadayon pa ang iya rehabilitation.
Ginpahayag ni Limbungan nga ginakabig ang mag-utod nga dalagku nga dealer sang illegal drugs sa Oton.
Sa impormasyon sang police, may naga-supply lang sang illegal drugs sa mag-utod halin sa Muntinlupa. Kun mabaton na sang mag-utod ang illegal drugs, gina-video nila ang items kag ginapasa sa source agud mapabalo nga nabaton na nila, suno kay Limbungan.
Kahapon sang aga, nabaklan ang mag-utod sang isa ka sachet sang suspected shabu sa balor nga P20,000.
Na-recover pa gid ang apat ka sachet sang suspected shabu nga nagabug-at sang 25 grams kag may standard drug price nga P170,000.
Yara na sa kustodiya sang Oton police ang mag-utod nga ginpa-idalum na sa drug test.
Ginhimo ang operasyon sang Provincial Drug Enforcement Unit kag Oton Police Station Drug Enforcement Team.
