9 KA SALAKYAN SA NA-DAMAGE, 2 KA EMPLEYADO NAPILASAN SANG NAGLABAY ANG BUHAWI SA CAR TRADING DISPLAY AREA SA TAGBAK, JARO

ILOILO CITY — Na-damage ang mga salakyan sa display area sang Car Trading sa Tagbak, Jaro sang natup-an sang atop sa paglabay sang buhawi kaina sang aga.

Sa pagpangusisa sang Aksyon Radyo Iloilo news team, siyam ka mga pribado nga salakyan ang napilpilan sang atop.

May salakyan nga na-damage ang windshield samtang may nagasgasan sang natup-an sang atop.

Ginkumpirmar naman ni alyas Dodong, chief painter sa Car Trading nga duha ka empleyado ang napilasan sa insidente.

Gindala sa ospital suno sa iya ang isa tungod sang pilas sa tiil kag idalum sang bibig, samtang ginhatagan sang first aid ang isa pa ka empleyado nga nagasgasan sa tuo nga tiil.

Suno naman sa tag-iya sang Car Trading, gulpi nga naghuyop ang mabaskog nga hangin kag narusdak ang ila atop, samtang ang atop sa tupad nga establisemento nga naga-buy and sell sang mga salakyan ang nagtupa sa ila display area.

May parte man sang atop sang Car Trading nga napalid sang hangin.

Magluwas sa na-damage nga mga salakyan, isa ka balay nga human sa light materials ang naguba sang buhawi. Wala sang tawo ang balay sang naglabay ang buhawi.

Nagapadayon ang clearing operation sa lugar. —via Angel Mae Ciudad