Pangayaw nga lalaki dakup sa Comelec checkpoint sa City Proper
ILOILO CITY — Na-aresto ang 43-anyos nga lalaki sang nakuhaan sang kutsilyo sa COMELEC Checkpoint sang Iloilo City Police Office sa Bonifacio Drive, Brgy. President Roxas, City Proper las 12:58 kaina sang kaagahon.
Ginkilala ang nadakpan kay Ramon Dapita, Jr. sang Brgy. Cabugao Norte, Pavia.
Sa spot report sang ICPO, nagahimo sang checkpoint ang kapulisan sang naglabay si Dapita nga nagasakay sa motorsiklo nga wala sang helmet.
Ginpapondo si Dapita kag ginpangitaan sang driver’s license apang wala sang may ginpakita. Sang ginrekisa, nakuha sa iya ang kutsilyo nga ginabanta nagalaba sang 12 ka pulgada. Ginkumpiskar man ang iya motorsiklo.
Detained sa custodial facility sang ICPO si Dapita tungod sang pag-drive nga wala sang lisensya kag paglapas sa Comelec Resolution No. 10918 ukon ang Ban sa pagdala kag pag-transport sang pusil ukon iban pa nga deadly weapons sa tiun sang election period sa Barangay kag Sangguniang Kabataan Elections sa Oktubre 30.
