Indian national ginhold-up sa Dumangas; P14K nga koleksyon kag motorsiklo sang biktima nataban

ILOILO— Nakuha sang duha ka mga hold-upper ang P14,000 nga koleksyon sang Indian national sa Barangay Pulao, Dumangas las-11 kahapon sang aga, Agosto 30.

Ginkilala ni Police Chief Master Sergeant Kim John Banzon, imbestigador sang Dumangas Municipal Police Station, ang biktima kay Shagun Preet Singh, nagatenir sa Jaro.

Suno kay Banzon, gin-report sa ila sang barangay kapitan nga may gin-hold up sa area gani gilayon nila nga ginpadulungan.

Base sa imbestigasyon sang police, nagpanukot sa housing site sa Barangay Pulao ang biktima sang ginbanggaan sang duha ka mga suspect nga nagasakay sa motorsiklo sang nagapaguwa na siya sa lugar.

Nagpanaug ang suspect nga angkas sa motorsiklo, ginpalapitan ang Indian national kag ginhampak sang 9mm calibre pistol ang helmet sang biktima, suno sa police. Diri na kag nagdeklarar sang hold-up ang suspect.

Ginhatag na lang sang biktima ang iya kwarta lakip na ang iya motorsiklo sa mga suspect.

Madasig nga nagpalagyo ang duha ka suspect sakay sa ila motorsiklo, samtang ginsakyan naman sang isa pa ka suspect nga nagpanaug ang motorsiklo sang biktima, suno sa police.

Sa pag-check sang police, naglabay ang duha ka mga holdupper sa Balabag, Dumangas kag nagliko sa direksyon pa-Barotac Nuevo pero wala na nakita kun nakadiretso sa banwa.

Wala nakita sang biktima ang hitsura sang mga suspect tungod nagasuksok sang helmet, suno sa police.

Pero may testigo naman nga nagpahayag nga nakita niya ang nawong sang mga suspect tungod nagtambay pa sila sa vulcanizing shop kag mabakal kun tani sang gasolina antes nagpang-hold up, suno sa police.

Tubtob subong, wala pa sang identity ang police sa duha ka mga suspect.