PILA KA RESIDENTE SA ZONE 3 COCHERO, MOLO NAGREKLAMO NGA GINPASIRADUHAN ANG ILA RIGHT OF WAY

ILOILO CITY – Nagalibog ang ulo sang pila ka mga residente kun diin na sila malabay tungod ginpatindugan sang semento nga pader ang ila right of way sa Zone 3, Brgy. Cochero, Molo.

Sa pagpangusisa sang Aksyon Radyo Iloilo news team, pribado ang duta nga right of way sang mga residente kag ginabawi na sang tag-iya.

Suno kay Nelito Jaime, isa sa mga residente, mapilitan sila nga magtaklas sa pader tungod wala na sang may maagyan. Makaluluoy suno sa iya ang mga estudyante kag senior citizens tungod mabudlayan sila nga makaguwa ilabe na sa tiun sang emerhensiya.

Gin-aku ni Jaime nga nag-istorya sila sa tag-iya sang duta subong nga Agosto nga kuntani mahatagan sila sang gamay nga espasyo nga bisan tawo lang ang makaigu pero indi magpasugot.

Nag-apelar man sila nga kuntani hulaton na lang nga ma-relocate ang mga residente nga yara sa sulod antes patindugon ang pader. Suno kay Jaime, amat-amat na nga ginasaylo ang mga residente sa relocation site sang siyudad gani nag-apelar sila sang dugang pa nga tiyempo ugaling wala gid sila ginpamatian sang tag-iya.

May alternatibo pa sila nga malutsan halin sa entrance pero kinahanglan sang residente nga magsulod sa isa ka tiyangge, lapus sa kaiping nga computer shop, lusot sa isa ka balay agud makasulod ang mga residente sa ila lugar.

Ginpahayag naman ni Salvacion Cortel nga tag-iya sang balay, mapasugot man sila nga makalabay ang mga residente pero tubtob lang las-otso sa gab-i.

Importante gid suno sa iya ang right of way sa pagsinalayo sang mga residente sa lugar tungod ini ang mayor nga nga gina-agyan sang kadamuan sa lugar.

“IPALAB-UT SA CITY GOVERNMENT”

Pila ka beses nga gin-istorya sang mga pumuluyo kaupod ang barangay officials ang tag-iya sang duta nga indi lang anay pagsiraduhan ang right of way.

Suno kay Punong Barangay Teresita Chua, indi gid magpasugot ang tag-iya tungod kinahanglanon nila ang duta sa pihak sang madamo nga apelasyon.

Gin-istoryahan man suno sa iya nga sa Disyembre subong nga tuig patindugon ang semento nga pader sa right of way pero nakibot lang sila nga ginpatindog na ini subong nga Agosto.

Gindugang pa niya nga wala man sila sang may mahimo sa desisyon sang tag-iya tungod pribado ang duta. Sa pagkahibalo ni Chua, ginadalian sang tag-iya ang duta tungod ginapahalin man sila sa ginatindugan sang ila balay.

Tungod sini, idangop sang mga barangay officials ang problema sa Iloilo City Government agud mabuligan ang mga apektado nga residente.