Lalaki nga nakasakay sa motorsiklo gin-report nga pilit nga ginpasakay sa salakyan sa Jaro

ILOILO CITY — ILOILO CITY – Gina-validate sang Jaro police ang gin-report nga may lalaki nga pilit ginpasakay sa salakyan nga puti sa Jaro mga las-singko kahapon sang hapon, Setyembre 11.

Base sa impormasyon sang Aksyon Radyo Iloilo, sakay ang lalaki sa motorsiklo halin sa Brgy. Sambag kag padulong sa Jaro Plaza ang direksyon. Pag-abot sa boundary sang Brgy. Sambag kag Brgy. San Isidro, Jaro, ginpahayag nga may nagpanaug nga apat ka tawo sa salakyan nga puti kag pilit nga ginpasakay sa salakyan ang naka-motorsiklo.

Ang isa sa apat nga nagpanaug naman sa salakyan, amo ang nagmaneho sang motorsiklo kag nagpadulong sa direksyon sa Jaro Plaza.

May mga nagahambal nga awto ang salakyan kag may maga nagahambal nga SUV.

Sa pagpangusisa sang Aksyon Radyo Iloilo news team, may pila ka mga nakakita sang insidente kag nagsaysay nga nagpangayo pa sang bulig ang lalaki. Ginpahayag sang isa sa mga residente malapit sa lugar nga nakabati siya sang lalaki nga nagsinggit kag nagapangayo sang tabang. Makaligad ang pila ka minutos, nagguwa siya kag nabalitaan niya nga may ginpilit pasakay sa salakyan pero wala niya ini nakita.

May na-istorya man ang Aksyon Radyo Iloilo news team nga pila ka residente kag nagpahayag nga nakita nila ang insidente pero nagpamalibad nga magpa-interview tungod sa kahangawa nga “mabalikan” sila.

Magluwas sa police, nagapangusisa man ang mga barangay officials agud ma-validate ang insidente.