COMELEC 6 wala pa sang may nabaton nga complaint vs. pre-mature campaigning sa BSKE 2023

ILOILO — Wala pa sang may nabaton nga reklamo ang Commission on Elections 6 may kaangtanan sa mga pulitiko nga naga-premature campaigning para sa Barangay kag Sangguniang Kabataan Elections sa Oktubre 30.

Suno kay COMELEC 6 Director, Atty. Dennis Ausan, nagapakita lang ini nga masinulundon kag mabuot ang mga aspirants sa Rehiyon 6.

Nagpaandam man si Ausan sa mga nagapapili sa BSKE 2023 nga election offense ang temprano nga pagpangampanya kag mahimo nga ma-disqualify sa pagpungko sa anu man nga public office.

Ginpahanumdom niya nga masugod ang campaign period sa Oktubre 19 nga magalawig tubtob Oktubre 28.

Sa siyudad kag probinsiya sang Iloilo, 65,312 ang mga nag-file sang Certificate of Candidacy para sa nagahilapit nga eleksyon.