Lalaki nga nag-order sang jacket online na-disappoint tungod “lapat” ang gin-deliver

Sobra nga disappointment ang nabatyagan sang tagreklamo nga si Jorgil tungod lain nga item ang nag-abot sa iya sang sa gin-order niya sa online.

Suno sa tagreklamo nag-order siya sang set sang jacket nga may dala nga pantalon sa online sa balor nga P895.00 pero nakibot siya nga puro t-shirt ang unod sang parcel nga nag-abot sa iya.

Ginpahayag pa ni Jorgil nga “daw mga lagu” pa ang mga t-shirt nga nag-abot.

Dugang niya, ulihi niya na nabal-an nga madamo na ang natontuhan sang page nga iya ginbaklan tungod ginapang-delete suno sa iya sang naga-manage sang page ang negatibo nga komento sa ila mga produkto.

Gin-report na ni Jorgil sa courier sang package ang lain nga item nga nag-abot sa iya kag ginahulat niya na lang ang sabat sang store nga iya ginbaklan.

Gin-chat niya man ang seller apang wala na naga-reply.