Mga taxi operators nagpasalig nga safe magsakay sa ila taxi

Wala sang dapat kabalak-an ang mga pasahero tungod safe ang mga taxi units sa Iloilo City.

Ginpasalig ini ni Mr. Alan Palacios sang Daily Driver Transport Corporation, sa meeting nga ginpatawag ni Iloilo City Police Office Director PCOL Joeresty Coronica kahapon, Setyembre 19.

Gin-imbitar ni Colonel Coronica ang mga taxi operators kag drivers para sa dayalogo tungod sa sunod-sunod nga mga issues nga ginadalahigan sang mga taxi drivers sang damlag lang.

Sa ila meeting, gin-share sang mga operators ang nagkalin-lain nga ideya kag kun paano ang hiring sa mga drivers.

Na-istoryahan man ang solusyon pareho sa pagsiguro nga naga-andar ang dash cam sa kada unit.

Ginsuhestyon man ni Coronica sa mga taxi operators nga tapikan sang pangalan sang driver ang taxi unit kag mag-conduct sang drug test.

Dugang ni Coronica, mas maayo nga kuhaan sang pasahero sang litrato ang sakyan nga taxi kag ipadala sa iya pamilya.