1 patay 1 pilason sang gin-arado sang LGU rescue vehicle ang payag sa Passi City

ILOILO — Patay ang 50-anyos nga babaye samtang pilason ang iya 59-anyos nga utod sang gin-arado sang Passi City LGU Emergency Rescue Vehicle ang payag nga ila ginapahuwayan sa Brgy. Bayan kahapon sang hapon, Oktubre 10.

Suno kay Police Master Sergeant Jervin Palec, imbestigador sang Passi City Police Station, posible nga pakadto kun tani sa kaiping nga barangay ang rescue vehicle sang naglupok ang unahan nga goma sang salakyan kag nadulaan sang kontrol sa pagmaneho ang driver.

Tungod sini, naglapaw sa karsada ang salakyan kag gin-arado ang payag nga ginapahuwayan sang mag-utod.

Gindala sa ospital ang duha pero napatay ang 50-anyos kag padayon pa nga ginabulong ang 59-anyos.

Gin-hold naman sang police ang driver sang salakyan.