TTW building nga nahamtangan sang opisina sang SSS-Iloilo Central Branch “structurally safe and sound” — Office of Building Official
ILOILO CITY — “Structurally safe and sound” ang TTW building nga nahamtangan sang Social Security System (SSS) Iloilo Central branch.
Suno kay Building Official Engr. Mavi Gustilo, nag-certify ang structural engineer sang TTW building nga safe for occupancy ang nasambit nga building.
Gin-check man sang OBO ang building kag suno kay Gustilo, wala sang may nakita nga visual defect magluwas lang sa mga ‘superficial’ nga litik nga nakit-an sa Bank of Commerce nga isa sa mga tenant sang building.
Isa sa mga ginalantaw sang OBO nga ginhalinan sang nabatyagan nga pagtay-ug amo ang gina-conduct nga ‘pile driving’ sa Iloilo Central Market nga ginabanta 400 metros ang kalayuon sa TTW building.
Biyernes sang ginsirado ang SSS-Iloilo Central branch tungod naka-eksperyensya ang mga empleyado kag transacting public nga ‘nagatay-ug’ sa 3rd kag 4th floor sang building.
