Mabatyagan nga pagtay-ug sang building ‘natural’ nga reaction sa pile driving — Office of the Building Official
ILOILO CITY — Natural nga reaction sa pile driving ukon paglubong sang mga pilote kun may mabatyagan nga pagtay-ug sang building suno kay Building Official Engr. Mavi Gustilo.
Isa ini sa mga rason kun ngaa ginalantaw sang OBO nga rason sa nabatyagan nga pagtay-ug sa SSS-Iloilo Central branch sa TTW Building sa Mapa St. ang nagapadayon nga pile driving sa Iloilo Central Market. Malapit lang ang central market sa TTW Building.
Gin-athag niya nga kun malab-ut na sang pilote ang pinaka-idalum sang duta nga masarangan sini, diri na may nagakatabo nga ‘refusal.’
Ang resulta sang refusal suno pa kay Gustilo amo ang mabaskog nga vibration ilabe na nga heavy equipment ang ginagamit kag suno pa sa iya ‘daw gina-push’ sini ang duta sa tungod sa kabug-aton.
Padayon ang monitoring sang OBO agud mahibaluan kun ang pile driving gid man ang rason sang pagtay-ug nga nabatyagan sa pila ka building sa City Proper area.
