Mangunguma patay sang gintiro sa Passi City
ILOILO – Patay ang mangunguma sang gintiro sa Barangay Talongonan, Passi City pasado las-11 kahapon sang udto, Oktubre 18.
Ginkilala ang biktima kay Rommel Benedicto, 35, samtang suspect si Jenjen Firmeza, 56, lunsay residente sang nasambit nga barangay.
Suno kay Police Lieutenant Colonel Benjo Clarite, hepe sang Passi City Police Station, samtang nagaatender sang iya katubuhan ang biktima nag-abot ang suspect kag gintiro siya gamit ang homemade shotgun. Base sa imbestigasyon, may indi pag-intidihanay ang duha may kaangtanan sa pagtalauma sang katubuhan.
May tatlo ka igo sa ulo ang biktima pero isa lang ka lupok ang nabati-an sang mga residente sa lugar. Nag-request naman sang autopsy agud mahibaluan kun diin pa gid ang igo sang biktima
Gindala pa ang biktima sa ospital pero gindeklarar nga patay, suno kay Clarite.
Pakaisa sang biktima ang asawa sang suspetsado.
At large ang suspetsado.
