“Money ban” ukon pagdumili sa pagdala sang P500,000 ukon masobra pa may kaangtanan sa BSKE 2023 ginapatuman sang Comelec

Ginpahanumdom ni Commission on Elections Chairman George Erwin Garcia nga ipatuman sugod subong nga adlaw tubtob sa Oktubre 30 ang money ban ukon ang pagdumili sa pagdala, pag-possess ukon pagbiyahe sang P500,000 ukon masobra pa nga cash may kaangtanan sa Barangay and SK elections.

Suno sa Committee on Kontra Bigay sang Comelec, ang otorisado nga mga tawo lang ang puwede makadala sang cash nga masobra sa P500,000 sugod subong tubtob sa adlaw sang piniliay.

Gin-athag ni Garcia nga indi pagpunggan ang pag-withdraw sang amo nga kantidad, pero dumilian ang pagpadala sini tungod kabigon nga magamit sa vote buying.

Ang madakpan suno kay Garcia nga nagadala sang amo nga kantidad nga indi man otorisado ang puwede ma-detain, ma-imbestigaran ukon makasuhan.

Lakip sa mga exempted sa money ban ang mga indibidwal nga may lehitimo nga background pareho sang negosyante, disbursement officials ukon cashiers.