Malapit P2 million nga balor sang suspected shabu na-recover sa drug buy bust operation sa Dumangas
ILOILO — Malapit sa P2 million nga balor sang suspected shabu ang na-recover sa duha ka high value individual nga subject drug buy bust operation sa Barangay Jardin, Dumangas pasado las-3 sang kaagahon sang Nobyembre 1.
Ginkilala ang mga nadakpan kanday alyas Romar, 39-anyos, nga amo ang main subject kag ang iya runner nga si alyas Tata 20-anyos, lunsay residente sang nasambit nga barangay. Samtang nakapalagyo naman ang utod ni alyas Romar nga si alyas Errol, 37-anyos.
Suno kay Police Captain Glen Soliman, head sang Regional Police Drug Enforcement Unit, nakaagi na dakup si alyas Romar sang 2016 kag nakaguwa sang 2021. Dugang pa niya, bagsakan sang illegal drugs ang balay ni alyas Romar kag halin ang supply sa Bureau of Jail Management and Penology sa Nanga, Pototan kag New Bilibid Prison sa Muntinlupa base sa impormasyon nga ila nabaton.
Ginpabutyag man ni Soliman nga may nakakita sa pagpalagyo ni alyas Errol apang wala nila siya maabutan tungod naka-focus na ang ila operasyon sa main subject.
Na-recover ang 18 tanan ka sachets sang suspected shabu nga ginabanta nagabug-at sang 280 grams kag may standard drug price nga P1.9 million.
Naglab-ot sa isa ka bulan ang monitoring sa subjects tubtob nga nadakpan.
Preso na sa Dumangas Municipal Police Station sanday alyas Romar kag alyas Tata samtang at large gihapon si alyas Errol.
