ICPO nagpanugyan sa publiko nga mag-aligmat samtang nagahilapit ang holiday season
ILOILO CITY — Nagpanugyan ang Iloilo City Police Office (ICPO) sa publiko nga mag-aligmat kag magdoble halong samtang nagahilapit ang holiday season.
Suno kay ICPO Director, Police Colonel Joeresty Coronica, paagi sa pagkooperar sang mga pumuluyo, malikawan ang pagluntad sang mga krimen nga makaguba sa selebrasyon sa Paskuwa kag bag-ong tuig.
Dugang pa niya, diri man masami nagasulod ang mga nagapangawat tungod ini ang tiun sang pagpanagtag sang mga year-end bonus.
Namanduan na suno sa iya, ang mga station commanders sa kada sa syudad nga ma-deploy sang mga police personnels sa mga matawo nga lugar pareho sang simbahan, transport terminals, ports, commercial establishments kag iban pa.
Samtang pasangkaron man ang puwersa sang mga police nga naga-duty kun gab-i, ilabe na nga nagahilapit ang Simbang Gabi kag Dinagyang Festival 2024 agud masiguro ang kalinong kag katawahay sa syudad.
Nagpasalig ang ICPO nga padayon ang pag-libot sang mga mobile patrol units agud malikawan ang pagluntad sang mga ilegal nga ulubrahon kag krimen.
