Kalan-an sa Cabatuan nasunog
ILOILO — Nasunog ang kalan-an sa Poblacion, Cabatuan kahapon, Nobyembre 20.
Suno kay Fire Officer 3 Daryl Talamera sang Cabatuan Fire Station, antes nagluntad ang sunog, nag-ilis sang LPG tank ang kalan-an.
May splitter ang LPG tank kag naga-angut sa duha ka stove suno sa iya. Sang nagluto sa pihak nga stove ang staff, wala pa sang problema pero sang nagluto na sila sa isa pa ka stove gulpi lang nag-ibwal ang kalayo.
Totally damaged ang kalan-an suno sa iya samtang wala naman naglaton sa 2nd floor ang kalayo tungod nahingagaw palong sang mga bombero.
Ginabanta P36,000 ang balor sang kahalitan sang sunog, suno kay Talamera.
