Punta sang tudlo sang pulis nautod sang ginkagat sang preso sa Lambunao
ILOILO — Padayon nga ginabulong sa Dr. Ricardo Y Ladrido Memorial District Hospital ang police sa Lambunao nga na-utod ang punta sang tuo nga middle finger sang ginkagat sang preso Sabado sang gab-i.
Suno kay Police Staff Sergeant Ramon Legayada, imbestigador sang Lambunao Municipal Police Station, antes ang insidente, gindakup sang police ang suspect nga si alyas Jeff tungod ginbuno niya si alyas Jed samtang ginahiwat ang victory party sang mga newly-elected barangay officials sa Barangay Natividad.
Ginpahayag ni Legayada nga sang ginsulod na sang police nga si Patrolman Gilbert Ajeno ang suspect sa karsel, gulpi lang siya ginkagat sa tudlo.
Nautod suno sa iya ang punta sang tudlo sang police gani gihingagaw sa ospital samtang ginbantayan sang jailer ang suspect.
Hubog ang suspect suno kay Legayada.
Natalana nga isaylo sa Western Visayas Medical Center sa Martes ang police para sa iya operasyon.
