Nagabantay sa Angel’s Burger sa Ticud, La Paz ginhold-up

ILOILO CITY — Ginabanta P3,000 ang nakuha sang naghold-up sa nagabantay sa Angel’s Burger sa Brgy. Ticud, La Paz mga las-dos kaina sang kaaghaon.

Suno kay alyas Rose, nagasakay sa motorsiklo ang mga suspek. Ang driver suno sa iya ang nag-order sang burger gani ginlutuan niya man.

Sang may ginkuot sa bag ang suspek, nagdumdom pa si Rose nga mabayad siya.

“Gali ang ginpaguwa niya pusil. Tapos naghambal siya ‘hold-up ni. Ang tanan nga kuwarta mo ihatag.’ Daw ginkasa niya amo to kulbaan ko. Siling niya kun indi mo pag-ihatag gusto mo may malain nga ihatag sa imo? Amo to, ang ginbilin nga kuwarta sa akon ginhatag ko,” suno kay Rose.

Tuyo pa suno kay Rose nga kuhaon sang suspek ang iya cellphone, pero naghambal siya nga wala siya sang cellphone.

Sang nakita sang suspek nga may nagapadulong nga salakyan, nagsakay ini sa motor nga nagahulat.

Wala na-itsurahan ni Rose ang suspek tungod may tabon tubtob sa ibabaw sang ilong kag mga mata lang ang kitaun. Wala man sang CCTV camera ang Angel’s Burger.

Nag-relieve lang si Rose sang natabu ang pagpang-hold-up.

Padayon ang imbestigasyon sang La Paz police agud makilala ang mga suspek. —via Angel Mae Ciudad