Bana patay, asawa pilason sa aksidente sa San Miguel, Iloilo

ILOILO —Patay ang bana samtang ginabulong pa ang iya asawa sang nabungguan sang taxi ang ginasakyan nila nga motorsiklo sa Barangay San Antonio, San Miguel kaina sang kaagahon.

Ginkilala ang napatay kay Junjun Brillantes nga amo ang naga-drive sang motorsiklo, samtang angkas ang iya asawa nga si Marilou.

Suno kay Police Major Richard Lao, hepe sang San Miguel Police Station, halin sa Leon kag pakadto sa San Miguel ang mag-asawa.

Pakadto naman sa Leon ang taxi driver nga ginkilala kay Ryan Claro.

Base sa pagpangusisa sang police, nadulaan sang kontrol sa manibela si Claro sang naglamsot ang preno rason nga naagaw niya ang linya sang kasugata nga motorsiklo.

Nagtabog gid ang mag-asawa tungod sa impact sang pagbunggo.

Yara na sa custody sang pulis si Claro.

Ang napatay ang newly-elected barangay official sa Barangay Agboy Norte, Leon. —via Angel Mae Ciudad