Magical-themed Christmas decorations sa Iloilo Provincial Capitol ginbuksan na
ILOILO — Nagbanaag nga daw kasubong sang amusement park ang Iloilo Provincial Capitol grounds sa pagbukas sang magical-themed Christmas decorations kagab-i, Disyembre 1.
Ginbutangan sang maduagon nga mga Christmas lights kag dekorasyon ang palibot kag sulod sang Kapitolyo.
Suno kay Iloilo Gov. Arthur Defensor, Jr., ini ang amot sang provincial government “sa pagpasadya sa siyudad kag probinsya sang Iloilo sini nga Paskuwa. Para ini sa aton tanan especially sa aton kabataan kag pamilya.”
Antes ang pagpasiga sang mga Christmas lights, naghatag sang kalingawan ang mga empleyado sang Kapitolyo nga nagparada bitbit ang waterproof nga mga lanterns.
May fireworks display man nga nagdugang sang duag sa event.
Naggasto ang provincial government sang P2.8 million para sa Christmas decorations sa Kapitolyo subong nga tuig.
Kadungan sang pagpasiga sang Christmas lights, may Bahandi Fair sa Capitol grounds sa diin makabakal sang mga lokal nga produkto tubtob sa Disyembre 21.
May Food Festival man nga magalawig sa Disyembre 20.
