Vallacar Transit, Inc. ginpapanaugan sang show-cause order sang LTFRB sa pagkahulog sang isa ka unit sang Ceres bus sa Hamtic, Antique

ANTIQUE – Ginpapanaugan sang Land Transportation Franchising Regulatory Board (LTFRB) 6 sang show-cause order ang management sang Vallacar Transit, Inc. tungod sa pagkahulog sang ila Ceres bus sa pil-as sang Brgy. Igbucagay, Hamtic, Antique sang Disyembre 5.

Ginkumpirmar ini ni LTFRB 6 legal counsel, Atty. Jun Altura.

Nabutang sa order nga dapat makasabat ang Vallacar sa sulod sang 72 oras ukon tatlo ka adlaw umpisa subong.

“Subong nga adlaw, nag-issue na kami sang show-cause order giving them [Vallacar Transit Inc.] 72 hours to explain why ang Ceres will not be penalized in accordance with our regulations,” suno pa kay Altura.

Magluwas sa show-cause order ginpanaugan man sang LTFRB 6 sang preventive suspension ang 12 ka mga units sa idalom sang fleet nga nalakip ang na-aksidente nga Ceres bus kag may ruta nga Iloilo-Antique vice versa sa sulod sang tatlo ka bulan.

“At the same time, ginbutang namon sila sa preventive suspension effective today valid for 90-days sa fleet nila nga kun sa diin naga-belong to ang na-involved nga salakyan. So 13 to sila sa isa ka fleet, so ang 12 [ginpa-idalom] sa preventive suspension. Buot hambalon, for the next 3 months indi sila maka-operate,” dugang pa ni Altura.

Pananglitan nga indi makasabat sa sulod sang tatlo ka adlaw ang management sang Vallacar Transit, mahimo nga ma-revoke ang ila franchise.

Gin-athag man ni Altura nga makabiyahe sa gihapon ang iban nga units sang Ceres bus sa amo nga ruta sa idalom sang iban nga franchise kag case numbers.

Nag-umpisa naman ang independent investigation sang LTFRB 6 nga ginapangunahan sang Technical Section sa natabu.

Base sa pinakaulihi nga data sang Antique Provincial Government, 17 ang napatay sa insidente.

Una na nga nagpaguwa sang 30 days suspension ang LTFRB 6 apang ginliwat kag ginhimo nga 90 days, suno kay LTFRB 6 Director Richard Osmeña.