Bangkay sang lalaki nasapwan nga naka-duct tape sa San Joaquin, Iloilo

Nasapwan ang bangkay sang lalaki nga ginhal-id malapit sa baybay sa Barangay Igcondao, San Joaquin, kahapon sang hapon, Disyembre 6.

Base sa impormasyon, may duct tape ang mata kag baba sang lalaki. Nakagapos man ang iya mga kamot sang duct tape.

Posible ginhal-id ang lalaki nga naka-duct tape ang mata kag nakagapos ang kamot.

Suno kay PCapt. Felix Perez, OIC sang San Joaquin Municipal Police Station, wala pa sila sang identity sang lalaki tungod wala ini sang ID ukon wallet.

Wala man sang may nakit-an nga visible gun shot wound ukon iban pa nga pilas ang biktima base sa inisyal nga imbestigasyon sang SOCO.

Dugang sang pulis, 5’6 ang height sang lalaki, dako ang panlawason, kag fair complexion.

Nakasuksok ini sang brown nga bayo kag itom nga shorts.

Gindala na sa punerarya ang biktima para sa dugang nga pagpangusisa sang operatiba.