Tudlo sa kamot sang barangay kapitan sa Ajuy ginkagat samtang may ginahusay nga reklamo

ILOILO — Napilas ang tuo nga index finger sang 50-anyos nga barangay kapitan sang Barangay Tagubanhan, Ajuy sang ginkagat sang isa sa mga ginahusay niya nga babaye sa barangay hall pasado las-4:30 kahapon sang hapon.

Suno kay Police Lieutenant Randy Lambungan, officer-in-charge sang Ajuy Municipal Police Station, may ginahusay nga reklamo sa tunga sang duha ka babaye si Kapitan Girly Amante sang natabu ang insidente.

Gina-areglo sang kapitan sanday Darlene kag Jackelyn nga nag-inaway sa social media.

Samtang ginahusay, may nagluntad nga komosyon sa tunga nanday Darlene kag Jackelyn tungod indi si Darlene magpa-areglo, suno sa police.

Gintulod ni Kapitan Amante paguwa sa barangay hall si Darlene sang hinali lang ginkagat ni Darlene ang tudlo sang kapitan.

Nagbanog ang tudlo ni Amante tungod sa pilas sang pagkagat pero wala man nautod.

Detained sa Ajuy Municipal Police Station si Darlene nga ginpasakaan na sang kaso nga direct assault.