Lalaki patay sang ginbuno sang iya abyan sa Arevalo

ILOILO CITY — Ginbuno sang iya abyan ang 39-anyos nga lalaki samtang naga-inom-inom sa Barangay Calaparan, Arevalo kahapon, Pebrero 4.

Suno kay Police Captain Mavin Laraño, officer-in-charge sang Arevalo Police Station, may nagluntad nga indi pag-intiendihanay sa tunga sang biktima nga si alyas Nonoy kag suspect nga si alyas Bryan.

Sa panaysayon sang mga testigo, ginapahayag ni Laraño nga naga-inom-inom pa ang duha antes natabu ang pagpangbuno.

Nakaagum sang duha ka pilas sa dughan ang biktima nga gilayon gindala sa ospital pero napatay samtang ginabulong.

Nadakpan ang suspetsado kag preso na sa Arevalo Police Station.