Tultugan Festival sang Maasin excited na nga magpasundayag sa Aliwan Fiesta 2024
ILOILO – Nagakalangkag na ang Tultugan Festival nga ipasundayag sa Aliwan Fiesta ang talento sang mga Maasinhon kag bamboo-made instruments nga bugal sang banwa.
Itiglawas sang Tultugan Festival ang Kasadyahan sa Kabanwahanan sang Iloilo Provincial Government sa Aliwan Fiesta 2024, nga gina-organize sang Manila Broadcasting Company (MBC).
Suno kay Maasin Mayor Francis Amboy, masugod na sila sa pagplano sa masunod nga semana kun ano ang mangin konsepto sang performance. Balantayan, suno sa alkalde kun ano pa gid ang mapabugal sang banwa.
Gin-aku ni Amboy nga wala sila nakabatyag sang pressure tungod suportado ang banwa sang provincial government.
“Considering nga Aliwan Fiesta na siya, on higher grounds na siya of course the battle of all champions na ‘na siya sa Philippines nga ginabantayan sang tanan. Ang balantayan gid da is kun paano namon malapawan ang amon nga gin-perform during sang Kasadyahan [sa Kabanwahanan],” suno kay Mr. Steven Jacosalem, choreographer sang Tultugan.
Anum ka beses na nga nagpasakop sa Kasadyahan sa Kabanwahanan ang Tultugan Festival kag may duha na ini ka championship titles – 2006 kag 2024. Samtang, masami man nga nakuha sang Tultugan ang Best in Music tungod sa ila pinasahe nga instrumento nga human sa kawayan.
Sa Aliwan Fiesta subong nga tuig, ginapaabot nga maatubangay ang Tultugan Festival sang Kasadyahan sa Kabanwahanan, kag Tribu Pan-ay sang Dinagyang Tribes Competition, kag tiglawas sang iban pa nga mga bantog nga festivals sa bug-os nga pungsod.
