Sumakwel Nava, Jr. nga utod ni former Councilor Plaridel Nava nagsumpa nga bag-o nga konsehal sang Iloilo City

(UPDATED) — Nagsumpa bilang bag-o nga miyembro sang Iloilo City Council si Sumakwel Nava, Jr. ang utod ni former Councilor Plaridel Nava nga nag-resign sang nagligad nga tuig.

Ini makaligad gin-aprubahan ni President Ferdinand Marcos, Jr. ang appointment ni Sumakwel, jr. agud magtal-us kay Plaridel.        

Ginpirmahan ni Iloilo City Mayor Jerry Treñas ang appointment letter kag ginpasumpa si Sumakwel, Jr.

Ginpaathag naman ni Plaridel Nava nga sang Enero 16, napirmahan ang appointment letter apang ginpadala pa sa Department of the Interior and Local Government (DILG) sa Metro Manila rason nga na-delay ang pag-abot sa iya nga utod. 

Madumduman sang nagligad nga tuig nga interview sang Aksyon Radyo Iloilo kay Plaridel, ginpahayag niya nga ang pagproseso niya sang mga kinahanglan sa pag-migrate sa Estados Unidos ang rason sang iya pag-resign sa konseho.

MATUON KAG MANILAG

Matuon kag manilag si newly appointed Councilor Sumakwel Nava, Jr. sa iya una nga adlaw nga pagpungko sa pwesto bilang miyembro sang city council.

Suno kay Nava, mangin pagpanghangkat sa iya ang pagpangalagad sa publiko kun ikumparar sa perspektibo sang iya utod nga si former Councilor Plaridel Nava.

Ginpasalig ni Sumakwel nga suportado niya ang mga plano ni Iloilo City Mayor Jerry Treñas kag handa man siya nga magpanindugan sa konseho kun kinahanglanon.       

Ginalauman nga matambong sa masunod nga regular session si Sumakwel, Jr.