Dinagyang Festival ginkilala nga Best Festival sa 2nd Philippine Leaf Awards

ILOILO CITY – Nagdaug ang Iloilo Dinagyang Festival bilang Best Festival sa Visayas sa 2nd Philippine Leaf Awards: Tertulia at Parangal 2024 kahapon, Pebrero 8.

Ini base sa Facebook post ni Director Elvert Bañares, artistic director sang Iloilo Festivals Foundation Inc. (IFFI), nga nagadumala sang Dinagyang Festival. Si Bañares ang nagbaton sang nasambit nga award.

Una na nga gin-anunsyar sang Philippine LEAF Awards nga lakip sa mga finalists nga halin sa Visayas amo ang Dinagyang sang Iloilo City, Ati-Atihan sang Aklan, Bailes de Luces sang La Castellana, Negros Occidental, kag Sinulog sang Cebu Province.

Ginpili ang nasambit nga mga festivals tungod, “these festivals have captured the essence of unity, Filipino pride, celebration, and innovation.”

Ang Philippine LEAF Awards amo ang prestihiyoso nga award-giving body nga nagahatag sang pagkilala sa outstanding achievement sang mga Filipino artists sa live entertainment, fashion, arts, kag festivals.