Bangkay sang lalaki nasapwan sa bakante nga lote sa Monterosa Subdivision sa Mandurriao
ILOILO CITY – Nasapwan ang bangkay sang lalaki sa bakante nga lote sa Monterosa Subdivision sakop sang Brgy. Calahunan, Mandurriao las-7:20 kagab-i, Pebrero 14.
Ginkilala sang iloy ang bangkay kay Gino Dubria, 55-anyos nga tumandok sang Antique pero nagatiner na subong sa Tabuc Suba, Jaro.
Ginpahayag sang iloy nga naghalin sa Tabuc-Suba si Gino mga las-12 kahapon sang udto agud magbaligya sang tinapay pero wala na nakapauli kaina sang aga.
Ipa-blotter na kuntani sang pamilya nga wala makapauli si Gino pero nakabaton sila sang tawag nga nagapahibalo nga patay na si Gino kag ginhaboy ni alyas MM sa Monterosa Subdivision.
Dali-dali nga ginpangita sang pamilya si Gino sa lugar mga las-5:30 tubtob las-6 pero wala gid nakita tungod sang masiut nga lugar, suno sa iloy.
Wala sang may matudlo ang pamilya nga motibo sa krimen pero gin-ako sang iloy nga “masabad” si Gino kun mahubog.
Sa initial nga imbestigasyon ni Police Master Sergeant Rey James Gallego, imbestigador sang Mandurriao Police Station, may nakakita sa biktima kag isa ka lalaki mga las-3 kahapon sang hapon nga naga-inum-inom sa Pali, Mandurriao.
Pagkatapos sini, nagkadto ang duha sa Monterosa Subdivision sakay sa motorsiklo mga las-7 sa gab-i.
Posible sa bakante nga lote natabo ang krimen, suno sa police.
May mga bagras sa guya kag pilas sang pagkabuno sang posible tool sang motorsiklo sa liug sang biktima, suno sa police.
Sa subong, gina-imbestigaran pa kun ano ang motibo sa krimen kag kun makabig nga person of interest si alyas MM nga ginatudlo sang pamilya may kahimuan sang natabu.
