Lalaki naglumpat sa taytay sa Jaro
ILOILO CITY —Nakibot ang mga residente sa kilid sang taytay sa Simon Ledesma, Jaro sang may nabatian nga naglagapok pasado las-siete subong nga aga kag natukiban nga may lalaki nga naglumpat halin sa ibabaw sang taytay.
Suno kay alyas Toto, wala man siya sang nakita nga pilas sa lalaki.
Nagpamangkot suno sa iya ang lalaki sang alagyan pabalik sa ibabaw sang taytay kag gintudluan man siya sang mga residente.
Liwat sila nakibot sang nabatian nga may nahulog sa tubig sa suba kag nakita ang lalaki nga una na naglumpat. Maayo lang suno kay Toto nga taga-hawak lang ang tubig gani naluwas gilayon ang lalaki.
Nagresponder ang Iloilo City Emergency Responders (ICER) kag gindala sa ospital ang lalaki. —via Angel Mae Ciudad
