School Year 2024-2025 masugod sa Hulyo 29, 2024 kag matakop sa Mayo 16, 2025 para sa amat-amat nga pagbalik sang April-May break
Amat-amat nga ibalik sang Department of Education (DepEd) ang April-May nga break sang mga estudyante sa mga eskwelahan paagi sa pag-adjust sang mga nabilin nga mga activities para sa School Year 2023 – 2024.
Sa ginpaguwa nga Department Order No. 03 series of 2024 sang ahensiya, ila ginpahayag nga magatakop ang School Year 2023 – 2024 sa Mayo 31 subong nga tuig kag maga-umpisa ang End of School Year (EOSY) break sa Hunyo 1 tubtob Hulyo 26, 2024.
Nabutang man sa DO nga hiwaton ang Third Quarter Examinations sa Marso 25 tubtob 26, kag ang Fourth Quarter Exam hiwaton naman sa Mayo 16 tubtob 17. Ginhaylo naman ang mga eskwelahan nga mag-conduct sang End of School Year rites sa Mayo 29 tubtob 31, 2024.
Naathag man sa DO nga wala sang voluntary ukon mandatory nga aktibidad ang ihatag sa mga manunudlo halin Hunyo 1 tubtob 30, 2024.
Nabutang man sa DO nga maga-umpisa ang School Year 2024-2025 sa Hulyo 29 subong nga tuig kag magatakop ini sa Mayo 16 sa masunod nga tuig.
Ginhimo ini sang DepEd bilang pagkilala sa resulta sang mga field surveys kag consultations sa mga national organizations, manunudlo, mga estudyante, kag stakeholders. — via | DepEd Philippines
