Suspek sa pagtiro sa iya suod nga abyan sa City Proper nag-surrender
ILOILO CITY — Ginkumpirmar ni Iloilo City Police Office (ICPO) Director PCOL Joeresty Coronica nga nag-surrender ang suspek nga nagtiro sa iya suod nga abyan sa Brgy. Rizal Estanzuela, City Proper kahapon aga, Pebrero 23.
Suno kay Coronica, nagsungka pagkahapon ang suspek nga si Charlie Layson, 45, sang Rizal Pala-Pala 1 paagi sa kilala niya police nga assigned sa Passi City Police Station. Tungod sini, ginsugat si Layson sa Passi City kag presu na subong sa Police Station 1.
Nagpamalibad ang suspect nga magsaysay sa natabo pero base sa imbestigasyon sang kapulisan nga may komprontasyon nga natabo antes ang pagpangtiro. Ginpahayag ni Layson, suno kay Coronica, nga “nagbunot” ang biktima nga si Jessie Gasis, 61, gani nga iya gin-unahan paagi sa pagtiro.
Pagkatapos sang krimen, nag-conduct sang hot pursuit operation ang kapulisan tungod gin-report nga nagpalagyo gilayon ang suspect.
Wala na na-recover sang kapulisan ang pusil nga gingamit.
Ginkumpirmar man ni Coronica nga estable na ang kondisyon ni Gasis sa ospital.
