P2 million nga balor sang suspected na-recover sa magkahagugma sa Iloilo City Proper

ILOILO CITY – Pareho nga nadakpan sa drug buy bust operation ang magkahagugma sa Brgy. Legaspi Dela Rama, City Proper kaina sang kaagahon.

Ginhimo sang Regional Police Drug Enforcement Unit 6 ang operation sa diin nakuha kanday Alyas Jacky sang Concepcion, City Proper kag Alyas Tisoy sang General Hughes, City Proper ang 23 ka sachets sang suspected shabu. Nagabalor sang P2 million ang kabug-usan nga na-recover nga suspected shabu.

Suno kay Police Captain Glen Soliman, OIC sang RPDEU 6, duha ka bulan nga gin-monitor ang illegal nga aktibidad sang magkagahugma antes ginhimo ang operasyon. Base sa impormasyon sang RPDEU 6, sa Iloilo City nagakuha sang supply ang duha.

Ginkumpirmar man ni Soliman nga nakaagi na presu tungod sa illegal nga druga ang duha pero pareho nga nakaguwa tungod sa plea bargaining agreement. —via Angel Mae Ciudad