Lalaki patay sang gintiro sa City Proper

ILOILO CITY — Napatay samtang ginabulong sa ospital ang lalaki nga natiruhan sa Villa Anita, City Proper kagab-i, Marso 17.

Ini ang ginkumpirmar ni Police Captain Roque Gimeno III, hepe sang City Proper Police Station.

Ginkilala ang biktima kay Reniel Lazaro residente sang amo nga barangay nga nakaagum sang pilas sang pagkatiro sa tuo nga porsyon sang dughan, duha sa idalom nga porsyon sang likod kag isa sa likod nga porsyon sang iya paa.

Base sa footage nga kuha sang CCTV nga yara sa tiyangge kag sa panaysayon sang

witnesses, may motor nga nagdulog kun sa diin nanaog ang nagaangkas kag gulpi lang gintiro si Lazaro.

Dugang pa sang witness, may ginhambal pa nga ngalan ang gunman kag sang ginkumpirmar sang biktima nga siya ang ginatumod gulpi lang siya gintiro.

Nakita man sa CCTV footage nga nagasuksok sang grey nga jacket, grey nga bonnet, face mask nga green, pula nga shorts kag tsinelas ang nagtiro sa biktima.

May na-recover nga tatlo ka basiyo sang bala kag slug sang caliber 45 nga pusil sa crime scene.

Nagapadayon ang hot pursuit operation sang mga police paagi sa pag-check sang mga CCTV nga posible naka-capture sang ruta nga gin-agyan sang mga suspect.