Pagdeklarar sang Pertussis outbreak sa siyudad sang Iloilo gin-aprubahan sang CDRRMC
Gin-aprubahan sang iloilo City Disaster Risk Reducation and Management Council (CDRRMC) ang pagdeklarar sang Pertussis ukon whooping cough outbreak sa siyudad sang iloilo tungod sa na-record nga mga kaso sang balatian sa tatlo ka distrito.
Sa meeting sang CDRRMC kaupod si Iloilo City Mayor Jerry Treñas kahapon, Marso 25, gin-aprubahan man ang pagpasa sang rekomendasyon agud ideklarar ang state of calamity sa siyudad tungod sang Pertussis.
Sa pito ka kumpirmado nga kaso nga na-record sang City Health Office, tatlo diri ang halin sa Jaro, duha sa Molo, kag duha sa Arevalo.
Ginpahayag sang alkalde nga ipreparar na lang ang mga dokumento para ipaidalum ang siyudad sa Pertussis outbreak.
Sa tiun nga mapaidalum sa state of calamity, gamiton sang siyudad ang proposed P16-million nga calamity fund para sa pagbakal sang bulong kag bakuna batok sa balatian.
Pila sa mga sintomas sang pertussis amo ang pagbarukoy sang ubo nga nagalawig sang duha ka semana, nabudlayan sa pagginhawa, pagsuka tungod sang sobra nga pag-ubo kag nagapalanggit-um.
