Kaso sang pertussis sa Iloilo City nadugangan

Nadugangan sang duha ang kaso sang pertussis ukon whooping cough sa siyudad base sa pinakaulihi nga datos sang City Health Office – Epidemiology and Surveillance Unit.

Sa kabug-usan, siyam na ang positibo nga kaso sang Pertussis sa siyudad kag siyam man ang probable case.

Apat na ka mga distrito sa siyudad ang naka-record sang kaso nga amo ang Jaro, Arevalo, Molo kag Lapuz.

Una na ginhaylo sang city government ang publiko nga magsuksok sang face masks ilabe na ang mga kabataan kag vulnerable nga sektor kasubong sang mga nagabusong kag tigulang.

Gin-athag man ni Mayor Jerry Treñas nga wala sang lockdown nga matabu bisan ginpa-idalum ang siyudad sa state of calamity tungod sa pertussis outbreak.

Pila sa mga sintomas sang pertussis ang pagbarukoy sang ubo nga nagalawig sang duha ka semana, nabudlayan sa pagginhawa, pagsuka tungod sang sobra nga pag-ubo kag pagpalanggit-um.