4 ka lalaki nadakpan nga nagapangawat sang kable sang internet sa Passi City

ILOILO — Nadakpan ang apat ka mga lalaki nga nagapangawat sang kable sang internet sa Simeon Aguilar Street, Barangay Poblacion Ilawod, Passi City mga kahapon, Abril 5.

Suno kay Police Master Sergeant Gonzalo Plete Jr., imbestigador sang Passi City Police Station, naaktuhan sang mga empleyado sang internet service provider nga PANTELCO nga may nagapang-utod sang ila mga kable.

Ginpahayag ni Plete nga may device sa opisina sang internet service provider nga naga-alarm sa tiun nga may mag-utod sang ila kable gani gilayon nga ginkadtuan sang mga empleyado ang lugar.

Sa pagpangusisa sang police, nahibaluan nga taga-Negross Occidental ang tatlo ka mga lalaki kag taga-Dumaguete naman ang isa.

Preso na sa Passi City Police Station ang mga nadakpan kag napasakaan na sang kaso. — via Aksyon Kayla Tingzon