Estudyante nga nagabaligya sang pagkaon sa bus para may dugang nga pang-allowance gindayaw sang mga netizens
ILOILO – Gindayaw sang mga netizens ang estudyante nga babaye nga nakuhaan sang video nga nagabaligya sang bicho-bicho samtang nagasakay sa Ceres bus.
Suno kay Richard Deypalubos nga nag-post sang video, ginsugid sang estudyante nga dugang niya nga pang-allowance ang income sa pagbaligya sang pagkaon.
Bisan ang mga pasahero sang bus nagdayaw man sa estudyante tungod wala siya nahuya sa pagbaligya.
“Gin-post ko para mangin good example siya sa iban nga ga-eskwela,” suno kay Deypalubos.
Nagsakay suno kay Deypalubos ang estudyante sa Barotac Nuevo kag nagpanaug sa St. Vincent College sa Leganes.
Sa pag-istorya ni Deypalubos, third year na sa kurso nga accounting ang estudyante.
“WALA GID KO NAHUYA MAGBALIGYA KAY TINLO NA NGA PAAGI”
Iskolar kag lakip sa top performing students sa St. Vincent College sa Leganes ang 21 anyos nga si Ivy Joy L. Porras sang Ilaya Poblacion, Barotac Nuevo.
Ginsaysay ni Ivy nga wala gid siya nahuya sa pagbaligya sang mga kakanin halin sang elementary siya. “Halin elementary days ko asta nag-high school asta sa college subong wala gid ko nahuya magbaligya kay ti tinlo man na nga paagi. Indi man na panunto.”
Ang iloy ni Ivy ang nagaluto sang iya ginabaligya nga iya ginadala sa eskwelahan. Nagakaubos man suno kay Ivy ang iya baligya kada adlaw bangud nagabakal ang mga estudyante kag manunudlo.
Nagapasalamat si Ivy tungod nga iskolar siya halin sang first year college pero ginpabutyag niya nga kinahanglan niya ang pangdugang sa allowance tungod tatlo sila ang naga-eskwela.
Si Ivy ang kamagulangan sa tatlo ka mag-ulutod. Kolehiyo naman ang nagasunod sa iya kag yara sa senior high school ang kamanghuran suno sa iloy ni Ivy nga si Marilou.
Trisikad driver ang amay ni Ivy, samtang magluwas sa pagluto sang kakanin kag mga sud-an, nagapanglabada man ang iloy niya.
