Suspek sa pagpatay sa 52-anyos nga babaye sa Miagao nag-ako sa krimen pero nanginwala nga siya ang naghimulos sa biktima

MIAGAO, Iloilo – Gin-ako ni Kenneth Paguntalan, 26-anyos, sang Brgy. Diday, Miagao nga siya ang nakapatay sa 52-anyos nga si Marivic Felecisimo nga nasapwan sa Barangay Tambong, Miagao sang Abril 7 sang gab-i.

Pero ginpangiwala niya nga siya ang naghimulos sa biktima.

Suno kay Paguntalan, nagkilalahay sila ni Felecisimo sa ginpamiestahan nila nga balay sa Barangay Diday sang Abril 5.

Idul-ong niya kuntani si Felecisimo sa Barangay Tambong sang may nasugata sila nga lalaki sang Abril 6 sang kaagahon. Nag-istoryahanay suno kay Paguntalan ang lalaki kag ang biktima.

Nagpamangkot suno kay Paguntalan ang lalaki kun nga-a may upod ang biktima nga iban nga lalaki.

Sa pagpaathag ni Paguntalan, naglakat pa sila pero pag-abot sa unhan, ginhambalan siya sang lalaki nga magpabilin kun sa diin siya gatindog samtang gindala sang lalaki si Felecisimo kag ginhimuslan.

Pagkatapos suno sa iya sang pagpanghimulos, naglakat ang lalaki.

Nagsinggitan suno sa iya si Felecisimo nga nagapangayo sang bulig kag tungod kinulbaan siya nga siya ang mapasibangdan, ginkuga niya ang babaye tubtob nga nalipong kag iya ginbayaan.

“Hindi ko akalain ko na namatay siya sa aking pagsakal,” suno kay Paguntalan.

Nag-surrender si Paguntalan sa police kagab-i.