Soil test sang UTCP sa Aganan Flyover natukiban nga manabaw kun ikumparar sa confirmatory test sang DPWH 6

PAVIA, ILOILO — Natukiban sang Department of Public Works and Highways (DPWH) 6 nga manabaw ang ginkuhaan nga sample sang duta agud ipaidalom sa soil test sa Aganan Flyover sa Pavia sang una nga consultant nga United Technologies Consolidated Partnership (UTCP).

Suno kay DPWH 6 OIC, Engr. Sanny Boy Oropel, base sa soil test sang UTCP yara lang sa 24 meters ang lubong sang mga haligi apang nag-conduct sang confirmatory kag seismic test ang ahensya kag nagguwa sa initial nga resulta nga 54 meters pa makit-an ang matig-a nga porsyon sang duta.

Ginpahayag pa ni Oropel nga makapila na sila nagsulat sa taga-UTCP apang tubtob subong wala pa gid sila may nabaton nga sabat.

Nagahulat ang DPWH 6 sang budget nga ihatag sang central office agud maka-umpisa na sa pag-engage sa third-party consultant nga ma-imbestigar sang flyover.

P15 million ang ginapanan-aw nga budget sang ahensya para ibayad sa third-party consultant.

2022 sang ginmandu ni anay DPWH 6 Director, Engr. Nerie Bueno nga untaton ang construction sang flyover tungod nagapati siya nga pareho ang linyada sang duta sa Ungka Flyover.

May kalabaon nga 436.90 meters ang Aganan Flyover lakip na ang approaches kag may P802 million nga kabug-usan nga pondo. — via Aksyon Cedrick Anona