Record-breaking nga 46 degree Celcius nga heat index na-record sa Iloilo City kahapon, Abril 27

Na-record sa Iloilo City pasado la-una kaina sang hapon ang 46 degree Celsius nga heat index.

Suno kay Jan Baron, weather forecaster sang PAGASA-Iloilo, ini ang pinakamataas nga na-record nga heat index sa syudad halin 2023. Sang nagligad nga tuig, na-record ang 45 degree Celsius.

Sa heat index chart sang PAGASA, yara sa dangerous level ang ini nga numero gani ginapahalong ang publiko sa heat stroke kag iban pa nga heat-related illnesses.

Liwat nga nagpahanumdom sa publiko ang PAGASA nga likawan ang pagguwa sa balay ilabe na kun indi importante, magsuksok sang komportable nga panapton, magdala sang payong kag magbalon sang madamo nga tubig.

Ang heat index amo ang kapaang nga mabatyagan sang lawas suno sa PAGASA.