Lalaki patay sang gintiro sa San Joaquin, Iloilo
Patay ang 54-anyos nga lalaki sang gintiro sang naka-upod niya sa baylehan sa Sitio Catigpan, Brgy. Lawigan, San Joaquin mga las-3:30 kaina sang kaagahon.
Ginkilala ang biktima kay alyas Apa nga taga-Languanan, San Joaquin samtang ang suspect amo si alyas Kano sang Mabini Norte sang amo man nga banwa. Pareho nga naka-inom ang duha sang natabo ang krimen, suno sa police.
Suno kay PCapt. Felix Perez, OIC sang San Joaquin Police, nagakatulog sa pulungkuan sa sulod sang baylehan si Apa sang ginpalapitan ni Kano kag ginpukaw agud magguwa na sa lugar.
Base sa pag-imbestigar sang San Joaquin police, samtang nagalakat ang duha halin sa baylehan, may indi pag-intindihanay nga natabo nga amo ang ginhalinan sang ila pagba-isay.
Una nga ginkuha ni Apa ang iya kutsilyo kag ginhana nga bun-on si Kano pero wala ma-igo rason nga ginhunos ni Kano ang iya pusil kag gintiro si Apa, suno kay Perez.
May igo sang bala sa dughan kag likod si Apa nga amo ang gintunaan sang iya kamatayon.
Una nga nakapalagyo ang suspect padulong sa direksyon sang Antique pero nag-surrender kaina sang aga.
Sa dugang pa nga pagpangusisa sang police, posible nga ginhalinan sang pagba-isay sang duha ang pagpatay sang biktima sa pakaisa sang suspect sang 2022, suno kay Perez.
Lakip sa mga recoveries sa lugar ang kutsilyo sang biktima kag lima ka basiyo halin sa pusil sang suspect. Samtang, gin-surrender man sang suspect ang iya pusil kadungan sang iya pag-surrender.
Mapasaka sang kaso ang pamilya ni Apa batok kay Kano. — via Marvin Malificiar
