“I can file cases against you” — Iloilo City Mayor Jerry Treñas sa mga katapo sang media tungod sa gin-report nga gina-imbestigaran sang UNESCO ang pagbakbak sa facade sang Iloilo Central Market
ILOILO CITY – Nagpamahog si Iloilo City Mayor Jerry Treñas nga puwede siya makapasaka sang kaso batuk sa mga katapo sang mainstream media.
Ginhimo sang alkalde ang pahayag sa regular press conference sa Iloilo City Hall sang nadiskusyunan ang pahayag ni UNESCO-National Commission of the Philippines Secretary General kag National Commission for Culture and the Arts (NCCA) Commissioner, Dr. Ivan Anthony Henares nga naga-imbestigar ang UNESCO kun nasunod ang proseso antes ang pagbakbak sa façade sang Iloilo Central Market.
Ginapanindugan ni Treñas nga may komunikasyon sila ni Dr. Henares kag ginklaro nga niya nga wala sang “formal investigation” ang UNESCO.
Ginpanginwala man ni Henares, suno sa alkalde, ang nasambit nga statement kag gintawag nga “irresponsible reporting” ang ginbalita sang pila ka mga news outlet sa Iloilo.
Sa forum sang National Museum of the Philippines sang Mayo 18, ginpabutyag ni Henares nga nagapati siya nga sang gin-aprubahan sang NHCP ang development sa merkado, wala namitlangan ang pag-demolish sa façade. Sa amo man nga event, ginpahayag pa ni Henares nga ginatun-an sang government cultural agencies kun nasunod sang city government ang proseso antes ginbakbak ang façade sang merkado.
Sang ginpamangkot pa si Henares sa nasambit nga forum kun ano ang salabton sang city government kun matuod nga wala nasunod ang proseso, suno sa iya, “we really can’t say what the liabilities are because we are still investigating the incident. If it was a unilateral decision of the lloilo City government to demolish the market tower structure without clearing it with the appropriate cultural agency then there will be some liabilities and we are going to look into that.”
Sa dugang nga pagpakig-ungat kay Henares, iya ginklaro nga NCCA kag indi UNESCO ang nagatuon sa nasambit nga insidente.
Sang damlag lang, mainit nga gin-istoryahan ang pagbakbak sang façade sang nasambit nga merkado tungod ginakabig ini nga cultural heritage structure sa siyudad. — via Aksyon Justice Savannah Pamplona
