Menor-de-edad pilason sang naigo sang nagtalang nga bala sa Calinog

ILOILO — Pilason ang 12-anyos nga bata nga babaye sang na-igo sang bala sa Barangay Badlan Grande, Calinog sang Mayo 25 sang gab-i.

Suno kay Police Major Myles Dieron, hepe sang Calinog Municipal Police Station, may nag-report nga may nagpalupok sang pusil kag nagtalang ang bala kag nag-igo sa menor-de-edad.

Sa pagpangusisa sang police, may mga lalaki nga nag-inum-inom malapit sa balay sang menor-de-edad gani nga gin-usisa sila.

Gintudlo naman sang mga lalaki ang ila upod nga si Boyboy, residente man sang barangay, nga posible nagpalupok suno kay Dieron.

Sa panaysayon sang mga lalaki, nagguwa si Boyboy sa balay sa diin sila naga-inom agud magpangihi kag posible didto na siya nagpalupok.

Ginpangita na sang mga pulis Boyboy. Sa pagpamangkot sa iya pamilya, wala sila nakahibalo kun diin si Boyboy.

Naigo ang menor sa likod kag yara na sa estable nga kondisyon.

Na-recover sa sulod sang balay sang biktima ang slug sang bala sang ginapatihan 9mm nga pusil kag may nakuha nga basiyo sa lugar malapit sa kun diin nag-inum-inom ang grupo ni Boyboy.

Nagapadayon ang hot pursuit operation sang Calinog police kay Boyboy. — via Aksyon Maria Kayla Tingzon