Pagnubo sang electricity rates sa Iloilo province lauman sa masunod nga bulan — ILECO General Managers

ILOILO — Ginalauman ang pagnubo sang residential rate sang kuryente sa masunod nga bulan.

Ini ang ginpahayag sang general managers sang Iloilo Electric Cooperative (ILECO) 1, 2 kag 3.

Suno kay ILECO III General Manager, Atty. James Balsomo, resulta sang mataas nga consumption sang konsumedor ang pagtaas sang rate sang kuryente sang nagligad nga billing ilabe na gid sa Marso kag Abril.

Tungod sini, nagtimbuok ang presyo sang supply sang kuryente sa Wholesale Electricity Stock Market (WESM) sa sulod sang 30 ka adlaw.

Dugang pa ni Balsomo, isa sa mga rason nga nag-contribute sa pagsaka sang power rate ang gulpi nga pag-ilis sang presyo sang kuryente sa WESM sa diin halin sa P6.55 nangin P15.73 ini nga epekto sang gin-issue sang National Grid Corporation of the Philippines (NGCP) nga 57 ka red alert status.

Pa-athag naman ni ILECO 1 General Manager, Engr. Miguel Paguntalan, ang nakonsumo nga elektrisidad sang konsumidor subong nga bulan ang ma-reflect pa sa Hunyo gani lauman ang manubo nga rate sa masunod nga bill.

Samtang ginpabutyag ni ILECO II General Manager, Engr. Jose Redmond Roquios nga luyag sang mga electric cooperatives nga mahatagan sang quality service ang mga konsumedor kag wala sila nagatutuok sa ganansya nga ila makuha.

Lakip sa mga factors sa ginalauman nga pagnubo sang bill sa masunod nga bulan ang pagnubo sang presyo sang kuryente nga halin sa P15.73 mangin P8 na tungod sa epekto sang manubo nga demand sang mga konsumedor.

Ginakabig man nga factor ni Atty. Balsomo ang pag-ulan na sa Western Visayas nga nagadala sang mabugnaw nga panahon.

Base sa datos, halin sa P12.90 nga rate sang ILECO 1 nangin P14.99 ini sang Abril. Samtang ang rate sang ILECO II halin P13.50 nangin P15.19 sa amo man nga period kag halin sa P11 nga rate sang ILECO III nangin P15 ini sang Abril. — via Aksyon Cedrick Anona