Feasibility study sang Iloilo-Capiz-Aklan Expressway ginatutukan sang DPWH 6
ILOILO – Nagapadayon ang feasibility study sa ginaplano nga Iloilo-Capiz Expressway (ICAEX), suno sa Department of Public Works and Highways (DPWH) 6.
Ginpahayag ni DPWH 6 Director, Engr. Sanny Boy Oropel nga may developer na nga naghatag sang unsolicited proposal paagi sa Private Public Partnership (PPP) services kag ginahulat na lang ang mangin resulta sang ila nga evaluation sa nasambit nga proyekto.
Wala naman ginhingadlan ni Oropel ang developer.
“Well speaking of ICAEX ara siya subong sa unsolicited proposal coming from the developer nga ara subong sa aton nga private public partnership service sang aton nga department. Ara siya sa state nga we can say nga gina-istudyuhan nila kun ini bala feasible ang study,” suno kay Oropel.
Magluwas sa evaluation kag nagapadayon nga feasibility study sa proyekto, gina-finalize man ang term of reference kag estimated budget for contract.
Base sa plano, magasugod ang ICAEX sa Brgy. MV Hechanova, Leganes sa diin diri man ang mangin point of origin sang ginaplano nga Panay-Guimaras-Negros Bridge.
Ginalauman suno kay Oropel nga daku ang mabulig sang expressway sa pagpalip-ot sang travel time sa Aklan, Capiz kag Iloilo sa diin mangin “game changer” man ini kag makapasanyog sang ekonomiya. Paagi man ang proyekto agud mapadasig ang pag-promote sang turismo sa rehiyon.
“This critical location ensures seamless access for travelers from the nearby islands of Guimaras and Negros. ICAEx will significantly reduce travel time, boosting economic activities and promoting tourism throughout the region,” dugang pa niya.
May kalabaon nga 210 kilometers ang ginaproponer nga expressway nga may apat ka lanes kag maka-connect sang duha ka siyudad kag 20 ka mga banwa sa Aklan, Capiz kag Iloilo.
Ang nasambit nga proyekto, isa sa mga ginapasalig ni President Ferdinand Marcos, Jr., sa iya State of the Nation Address (SONA) sang nagligad nga tuig. — via Aksyon Cedrick Anona
