Iloilo City Councilor Sedfrey Cabaluna pabor nga himuon 40% ang units sang mga first town jeepneys nga makasulod sa siyudad imbes nga 25% lang samtang ginapatuman ang ELPTRP
ILOILO CITY — Pabor si Iloilo City Councilor Sedfrey Cabaluna nga Chairman sang Committee on Transportation sa Iloilo City Council nga himuon 40% ang jeepney units sa kada kooperatiba sa mga first towns ang pahanugutan nga makasulod sa siyudad.
Sa full implementation sang Enhanced Local Public Transport Route Plan (ELPTRP) sang Iloilo City, 25% lang sang units sang kada first town ang ginapasugtan nga makasulod sa siyudad.
Suno kay Cabaluna, kun basehan ang PUV Modernization Program, dapat wala na sang provincial jeepneys nga makasulod sa siyudad. Pero ang numero sang mga public utility jeepneys wala nagasantu sa kadamuon sang mga pasahero.
Tungod may pagkinahanglan nga dapat dugangan ang una nga 25%, mas maayo pa nga ikonsiderar na lang ang hingyo sang first towns nga himuon 40% kag dulaon ang 15% nga buffer units sa 25%.
Sa ginhimo nga debriefing sang Traffic Management Unit (TMU) sang city government kaina sang aga, ginpresentar nga himuon na 40% ang pahanugutan nga first town jeepneys nga makasulod pero madamo sa taga-City loop nga operators ang nagapamalabag.
Bukas si Cabaluna nga istoryahan nila sang TMU ang pagkonsiderar sa amo nga tikang. — via Aksyon Marvin Malificiar
